طبعا كما يطري على بال كل واحد انه يتزوج ولا يرتبط بأحد
برضه يطري لي
هالشي يمثل حلم بالنسبه لاي شاب وشابه
وبعض الشيبان بعد
لكن للاسف
الواحد اذا نظر في وضعنا الاقتصادي الحالي
ييأس ويغسل يده بفلاش
نجي مثلا للذهب
اللي الحين طق سعره في السما
لو تبي تشتري شبكه ولا صباحه مدري وشي ذا الخرابيط
يبي لك حدود ال 30 الف
وبرضه المهر
اول البنت يكفيها 30 تكمل احتياجاتها
الحين تعطيهم 50 لا والمنه عليك
يقال لهم مسوين لك دسكاونت
هذا غير الهدايا والمطاعم والتميلح وقت الملكه وفواتير الاتصالات
اللي تقص الظهر
وهذا كله كوم
واذا جيت للزواج كوم ثاني
نبد بايجار قصر الافراح
اول ب 10 تاخذ لك شي متوسط
الحين يالله 50 وتاخذ لك شي سياحي وما يواجه بعد
وان جيب العشا الرجال
كل الناس هالايام قلبوا بوفيهات لانها ارخص
بعد ماكان يضرب المثل في البوفيه بالكشخه وان ما يحطه الا ناس واو
صاروا الحين يحطونه عشانه اوفر
يعني الذبيحه اللي ب 1200 ما تواجه
يبي لك من 1500 وانت ماشي
طبخ الذبيحه اول ب 100
الحين ب 200
يبي لك ات ليست عشر ذبايح
يعني 17 الف هذي عشى الرجال
غير الحريم
اذا جيتهم
يبون شي يواجه
ومافيهم سماحة الرجال
يحبون التكلف
نقول يبون 20 الف مع اني ما اتوقع يرضون بالعشرين
واذا لفيت شوي
قالوا لك الطقاقه ((او زي ما تحب تدلع عمرها الفنانه ))
طبعا الله يعينك
اول فيصل العيان يجي ب 12 الحين يالله من ال 50 وفيها
هذا وصوته مخيس
فما بالك بالطقاقه؟
لا وهذا غير تدلعها
تبون بعود؟! بأورق؟
وكل شي بثمنه
لا ويتشرطون انهم يبون بوفيه لهم بلحالهم
ولا يرضون بباقي العشا مثل اول
والحسابه بتحسب
نطلع من سالفه العرس
وطبعا ما ارح اناقش شهر العسل لان اذا اكل الرز والولاده في المستشفى نوع من الفسقه
كيف بيكون شهر العسل؟
نجي لسالفه التجهيز
منيب قايل بيت وبنا وبرابيس
لانه ما يخفى عليكم
ان طن الحديد الحين وصل 7 الاف
وهو اول يوم وصل 1200 قالوا غالي
الله يرحم ايام كان ب 920
ويوم وصل 1000
واحدن اعرفه وقف عمار وقال غالي
اجل وش نقول حنا الحين؟
الله يرخص الحديد
تجي تاخذ قرض من صندوق التنميه العقاري
تقعد طول عمرك ماسك سرا
الين ما تجي تتوفا ثم يقررون يعطونك القرض
عشان انت تقوم وبكل ذوق
تعطي القرض ولدك عشان يبني به بيت لولده
طيب كم ؟
300 الف؟
وش تسوي ذي؟
ولا تجيب حق حديد البيت
تدخل على المسؤول
يطل في وجهك
وبابتسامه ساخره وبكل تبلد الاحساس اللي في الدنيا
انا عارف انه ما يكفي
لكن وش تبيني اسوي؟
كل واحد يحاول يدبر عمره
<<يسرق مثلا؟
نرجع للشقق
بعد ماكانت الشقه ب 10000 وفي موقع ممتاز وتشطيب حلو
صارت الحين ب 20 الف لا وخارج منطقه الرياض بعد
وياقلب لا تحزن
تجي تأثث
طقم الكنبات اللي كان ب 5000 ووش زينه وحليو
الحين ب 10 الاف ويسمى تمشيه حال وتعبيرة
وغرفة النوم والفرش ووو...
طيب غيرت رايي
قررت اسكن عند اهلي واخلص من صداع السكن
محد يوافق ان بنته تسكن عند اهل زوجها
بعد ماكان من الطبيعي ان البنت تكون ببيت زوجها
وعند اهله
الين ما تتيسر اموره ويقدر يبني ويطلعون سوا
ببيت لحالهم
وسجل على الدفتر
جينا للاعاشه والاستهلاكيات
تبي حليب؟
تبي رز ؟
تبي خضار؟
ذاك اول
لا تصير مدلل مثل ابقار الدينمارك
وتاكل رز
لازم تغير عاداتك الغذائيه
جرب مرة تاكل عدس بدال اللحم
جرب تتغدى بيض وخبز مفرود
لان الصامولي بدال ما كان 10 بريال
صار 6 بريال
لا وصغروا حجمه بعد
واحسب ياللي لك خلق تحسب
زوجتي حامل
وتبي تولد
وانا متوهق بها
ما ادري وين اوديها لاي مستشفى
وتحتاج حاضنه
ادخل اكلم احد المسؤولين
يطل في وجهي بكل برائه
يقول تولد في اقرب مستشفى ولا ليه ما تولد في البيت ؟
الحريم هاليومين يحبون البرستيج
فعلا الولاده في المستشفى نوع من البرستيج وضرب من ضروب الفسقه
وفقنا الله وزرقنا بيبي صعنون كتكوت امور
تجي تجيب له حليب و حفايظ وانتم بكرامه
تكتشف ان نص ميزانيتك راح تروح على الحليب
وليه تشتري حليب له؟
شغل مضخاتها وخلها تنتج
ولا البقرة ازين منها؟
شوف عيني
واحد داخل معه مية ريال للصيدليه
عن عده يبي يرجع بباقي يشتري به خبز وحليب لبيته
شرا حفايظ وحليب اطفال
يوم جا يحاسب
وبكل ثقه مد المية ريال
قال له ما تكفي
انصدم وتعجب
لكن وش يسوي ؟!؟!؟
صار هالمنظر صار من الطبيعي نشوفه
قام رجع
وبدل البامبرز بنوع ارخص واقل حجم
عشان فلوسه ما تكفي
وخذ هالشي مقياس على كل شي
كل شي ارتفع
والراتب هو هو
فائض ميزانيتنا 300 مليار
وراتب السعودي 1500 ريال؟
ويبونه يفتح بيت؟
كل شي يغلى ويرتفع سعره
(الغالي للغالي)
الا راتب السعودي الضعيف
بدال ما يزود
تنقص قيمه الريال
ويصير رياله ما يسوى قرش برا وجوا
تدرون عاد ؟
معاد ابي اعرس 
هونت
ابي اعرس
العرض العادي
